Руте: Црна Гора се соочува со постојани хибридни закани од Русија

Генералниот секретар на НАТО, Марк Руте денеска ја потврди важната улога на Црна Гора во алијансата, нагласувајќи ги растечките закани со кои се соочува земјата од Русија и од други места.

-Црна Гора се соочува со постојани хибридни закани од руски и странски актери. Русија сака да создаде страв и да ја поткопа нашата поддршка за Украина. Нема да успее, изјави Руте за новинарите по средбата со црногорскиот премиер, Милојко Спајиќ во седиштето на НАТО.

Руте изрази благодарност за придонесот на Црна Гора во НАТО, особено за она што Подгорица го прави за поддршка на Украина.

Тој ја пофали Црна Гора за нејзините напори да го поттикне спроведувањето на одлуките донесени на самитот во Вашингтон, обезбедувајќи дека патот на Украина кон членството во НАТО не е загрозен.

Една од главните теми на разговорот меѓу Руте и Спајиќ беше заканата од Русија, особено преку кибер напади, дезинформации и политичко мешање.

Руте рече дека акциите на Русија се насочени кон дестабилизација на единството на НАТО и поткопување на поддршката за Украина, но изрази уверување во издржливоста на НАТО.

Тој, исто така, ја пофали Црна Гора за преземањето силни мерки против хибридните закани, како прв примател на тимот за контрахибридна поддршка на НАТО и за приклучувањето кон Групата за брз одговор на НАТО.

Во оваа прилика, Руте ја истакна и важноста од континуирана поддршка за Украина, особено затоа што таа се соочува со една од најтешките зими од почетокот на војната во 2022 година.

Тој ги повика сите сојузници да ги исполнат своите обврски преземени на самитот во Вашингтон во јули, вклучително и финансиските ветувања и воената поддршка.

-На Украина ѝ е потребна нашата итна поддршка, рече Руте само неколку недели пред инаугурацијата на американскиот претседател Доналд Трамп, кој е долгогодишен критичар на американската помош за НАТО.

Црногорскиот премиер Спајиќ, осврнувајќи се на насоките на НАТО за одбранбените инвестиции, рече дека Подгорица не само што е декларативно кредибилен партнер на НАТО, туку дека годинава ќе ја надмине границата од два отсто од бруто домашниот производ доделен во областа.

Посочувајќи дека Црна Гора е членка на НАТО веќе седум години, Спајиќ рече дека придонела во различни мисии на НАТО, вклучително и во Латвија, Бугарија и Косово.

Тој ги потврди и целите за одбрана на Црна Гора, со планови за зголемување на распределбите од 2,1 на 2,3 отсто од БДП во 2025 година.

Тој, исто така, ја потврди посветеноста на Црна Гора да ја поддржи Украина.

-Црна Гора ја поддржува Украина и верува дека членството во НАТО ќе биде крајна гаранција и за оваа нација, рече Спајиќ.

Спајиќ го истакна учеството на Црна Гора во испораката на воена опрема за Украина и учеството во сеопфатниот пакет помош на НАТО.